ភ្នំពេញ ថ្ងៃទី៣១ ខែកក្កដា ឆ្នាំ២០២៦ — រាជរដ្ឋាភិបាលកម្ពុជា បានបញ្ជាក់ជាថ្មីនូវការប្តេជ្ញាចិត្តរបស់ខ្លួនក្នុងការពង្រឹងវិស័យឯកជនរបស់ប្រទេស តាមរយៈការធ្វើសមាហរណកម្មយន្តការគាំទ្រផ្នែកហិរញ្ញវត្ថុ និងការពង្រីកការទទួលបានប្រភពទុនសម្រាប់អាជីវកម្ម ជាពិសេសសហគ្រាសធុនមីក្រូ តូច និងមធ្យម (MSMEs) នៅក្នុងឱកាសនៃការបើក «វេទិកាថ្នាក់ជាតិស្តីពីហិរញ្ញប្បទានសម្រាប់ធុរកិច្ច ឆ្នាំ២០២៦» ជាលើកដំបូង។
វេទិកានេះត្រូវបានរៀបចំឡើងនាថ្ងៃទី៣០-៣១ ខែកក្កដា នៅរាជធានីភ្នំពេញ ដោយក្រសួងសេដ្ឋកិច្ច និងហិរញ្ញវត្ថុ សហការជាមួយស្ថាប័នក្រោមឱវាទ និងអង្គភាពគាំទ្រដោយរដ្ឋសំខាន់ៗចំនួន ៨ ក្រោមប្រធានបទ «សមាហរណកម្មការគាំទ្រផ្នែកហិរញ្ញប្បទានរបស់រាជរដ្ឋាភិបាល ដើម្បីសម្រេចបានភាពធន់នៃសេដ្ឋកិច្ច»។
ព្រឹត្តិការណ៍នេះ ត្រូវបានប្រារព្ធឡើងក្រោមអធិបតីភាពដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងបានប្រមូលផ្តុំអ្នកចូលរួមប្រមាណ ៦០០ នាក់ រួមមាន តំណាងមកពីក្រសួង-ស្ថាប័នរដ្ឋ ដៃគូអភិវឌ្ឍន៍ គ្រឹះស្ថានហិរញ្ញវត្ថុ សមាគមធុរកិច្ច សហគ្រាស MSMEs និងសមាគមស្វាយចន្ទីកម្ពុជា (CAC)។
ក្នុងអំឡុងពេលនៃវេទិកានេះ មន្ត្រីជាន់ខ្ពស់បានប្រកាសថា រាជរដ្ឋាភិបាលបានផ្តល់ថវិកាជាង ១,៨៦ ពាន់លាន ដុល្លារអាមេរិក តាមរយៈស្ថាប័នគាំទ្រដោយរដ្ឋចំនួន ៨ ដើម្បីជួយដល់អាជីវកម្ម សហគមន៍កសិកម្ម សហគ្រាសកសិ-ឧស្សាហកម្ម និងសហគ្រាស MSMEs។
ស្ថាប័នទាំង ៨ ដែលបានចូលរួមរួមមាន៖ ធនាគារអភិវឌ្ឍន៍ជនបទ និងកសិកម្ម (ARDB), ធនាគារសហគ្រាសធុនតូច និងមធ្យមកម្ពុជា (SME Bank), សាជីវកម្មធានាឥណទានកម្ពុជា (CGCC), ផ្សារមូលបត្រកម្ពុជា (CSX), មូលនិធិអភិវឌ្ឍន៍សហគ្រិនភាព (EDF), សហគ្រិនខ្មែរ (KE), មជ្ឈមណ្ឌលបណ្ដុះធុរកិច្ចថ្មី «តេជោ» (TSC) និងមូលនិធិអភិវឌ្ឍន៍ជំនាញ (SDF)។
តាមរយៈការធ្វើការងារយ៉ាងជិតស្និទ្ធជាមួយវិស័យឯកជន ស្ថាប័នទាំងនេះបានផ្តល់នូវសេវាហិរញ្ញវត្ថុ ការធានាឥណទាន ការគាំទ្រសហគ្រិនភាព ការអភិវឌ្ឍកម្លាំងពលកម្ម និងកម្មវិធីចាប់យកបច្ចេកវិទ្យា ដែលត្រូវបានរចនាឡើងដើម្បីពង្រឹងភាពប្រកួតប្រជែងអាជីវកម្ម និងបង្កើនភាពធន់ទប់ទល់នឹងបញ្ហាប្រឈមផ្នែកសេដ្ឋកិច្ច។
ថ្លែងក្នុងពិធីបើក ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន មានប្រសាសន៍ថា វេទិកានេះឆ្លុះបញ្ចាំងពីវិធីសាស្ត្រសម្របសម្រួលរបស់រាជរដ្ឋាភិបាល ក្នុងការគាំទ្រដល់ការអភិវឌ្ឍវិស័យឯកជន តាមរយៈកិច្ចសហប្រតិបត្តិការអន្តរស្ថាប័នកាន់តែរឹងមាំ។
ឯកឧត្តមអគ្គបណ្ឌិតសភាចារ្យ បានមានប្រសាសន៍ថា៖ «វេទិកាថ្នាក់ជាតិស្តីពីហិរញ្ញប្បទានសម្រាប់ធុរកិច្ច ឆ្នាំ២០២៦ គឺជាការឆ្លុះបញ្ចាំងយ៉ាងច្បាស់អំពីកិច្ចសហប្រតិបត្តិការស្អិតល្មួតរវាងស្ថាប័នពាក់ព័ន្ធនៃរាជរដ្ឋាភិបាល ក្នុងការបង្កើតសហថាមពល និងការបន្ស៊ីគោលនយោបាយអន្តរស្ថាប័ន។ វេទិកានេះមានគោលដៅជំរុញការអភិវឌ្ឍវិស័យឯកជន តាមរយៈការលើកកម្ពស់លទ្ធភាពទទួលបានហិរញ្ញប្បទានប្រកបដោយបរិយាបន្ន និងភាពបត់បែន ដើម្បីធានាស្ថិរភាពអាជីវកម្ម និងពង្រឹងសន្ទុះសេដ្ឋកិច្ចជាតិ»។
វេទិកាដែលត្រូវបានរៀបចំឡើងជាលើកដំបូងនេះ ក៏បានដើរតួជាវេទិកាសម្រាប់អាជីវកម្មនានាក្នុងការស្វែងយល់អំពីកម្មវិធីគាំទ្រដែលមានស្រាប់របស់រដ្ឋាភិបាល ផ្លាស់ប្តូរបទពិសោធន៍ជាមួយគ្រឹះស្ថានហិរញ្ញវត្ថុ និងផ្តល់មតិយោបល់ដើម្បីកែលម្អសេវាកម្មសម្រាប់សហគ្រាស MSMEs។
សម្រាប់វិស័យកសិកម្ម រួមទាំងឧស្សាហកម្មស្វាយចន្ទីរបស់កម្ពុជាដែលកំពុងរីកចម្រើនយ៉ាងរហ័ស យន្តការគាំទ្រដែលត្រូវបានពង្រីកទាំងនេះ ត្រូវបានរំពឹងថានឹងជួយកែលម្អការទទួលបានហិរញ្ញប្បទាន ការគាំទ្របច្ចេកទេស និងការអភិវឌ្ឍជំនាញ ដែលអនុញ្ញាតឱ្យសហគ្រាសនានាវិនិយោគលើការកែច្នៃ បច្ចេកវិទ្យាទំនើប និងការផលិតដែលមានតម្លៃបន្ថែមខ្ពស់។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានលើកឡើងថា ការសម្របសម្រួលកាន់តែប្រសើររវាងស្ថាប័នគាំទ្រដោយរដ្ឋ និងវិស័យឯកជន នឹងដើរតួនាទីយ៉ាងសំខាន់ក្នុងការជួយឱ្យអាជីវកម្មកម្ពុជាបង្កើនផលិតភាព ពង្រីកការនាំចេញ និងរួមចំណែកដល់ភាពធន់នៃសេដ្ឋកិច្ចរយៈពេលវែងរបស់កម្ពុជា។