ព័ត៌មាន សសក
ភ្នំពេញ ថ្ងៃទី ១១ ខែវិច្ឆិកា ឆ្នាំ ២០២៥ — សមាគមស្វាយចន្ទីកម្ពុជា (សសក) និង សហគ្រិនខ្មែរ (KE) កំពុងស្វែងរកឱកាសដើម្បីពង្រឹងកិច្ចសហប្រតិបត្តិការនៅក្នុងអនុវិស័យស្វាយចន្ទី បន្ទាប់ពីកិច្ចប្រជុំមួយដែលបានធ្វើឡើងកាលពីថ្ងៃទី ១០ ខែវិច្ឆិកា។
ការផ្តួចផ្តើមអភិវឌ្ឍន៍ និងការគាំទ្ររបស់ សហគ្រិនខ្មែរ
គំនិតផ្តួចផ្តើមអភិវឌ្ឍន៍ទាំងនេះ ត្រូវបានគាំទ្រដោយកម្មវិធីរបស់ KE សម្រាប់ សហគ្រាសធុនតូច និងមធ្យម (SMEs)អាជីវកម្មទើបចាប់ផ្តើម (Startups) និងអាជីវកម្មអ្នកផ្តល់សេវា។ បច្ចុប្បន្ន សហគ្រិនខ្មែរ គាំទ្រដល់អាជីវកម្មជាច្រើននៅក្នុងវិស័យនានា រួមមាន បច្ចេកវិទ្យាព័ត៌មាន និងទំនាក់ទំនង (ICT) ភស្តុភារកម្ម ទេសចរណ៍ និងបដិសណ្ឋារកិច្ច។ នៅក្នុងវិស័យកសិកម្ម ការងាររបស់ KE ផ្តោតលើ សុវត្ថិភាពម្ហូបអាហារ ការផ្ដល់វិញ្ញាបនបត្រ និងជំនួយហិរញ្ញវត្ថុ។
ជាផ្នែកមួយនៃកិច្ចខិតខំប្រឹងប្រែងកាន់តែទូលំទូលាយរបស់រាជរដ្ឋាភិបាលកម្ពុជាដើម្បីកែលម្អសមត្ថភាពប្រកួតប្រជែងក្នុងវិស័យកសិកម្ម។ សហគ្រិនខ្មែរ កំពុងអនុវត្តកម្មវិធីបណ្តុះបណ្តាលមួយដែលត្រូវបានរៀបចំឡើងដើម្បីជួយ SMEs ទទួលបានចំណេះដឹង និងជំនាញបច្ចេកទេសដែលតម្រូវឱ្យទទួលបានវិញ្ញាបនបត្រសុវត្ថិភាពម្ហូបអាហារថ្នាក់ជាតិ និងអន្តរជាតិ។ ទាំងនេះរួមមាន៖ ស្តង់ដារកម្ពុជា (CS) ការអនុវត្តន៍ផលិតកម្មល្អ និងការអនុវត្តអនាម័យល្អ (GMP-GHP) ការវិភាគគ្រោះថ្នាក់ និងចំណុចត្រួតពិនិត្យសំខាន់ (HACCP) និង ស្តង់ដារ ISO។
សហគ្រិនខ្មែរ ដែលជាស្ថាប័នគាំទ្រដោយរដ្ឋាភិបាលបង្កើតឡើងដើម្បីជំរុញសហគ្រិនភាព និងនវានុវត្តន៍ ដើរតួនាទីយ៉ាងសំខាន់ក្នុងការគាំទ្រអាជីវកម្មក្នុងស្រុក និងលើកកម្ពស់ផលិតកម្មដែលមានតម្លៃបន្ថែមនៅទូទាំងវិស័យសំខាន់ៗនៃសេដ្ឋកិច្ច។
គោលដៅនៃភាពជាដៃគូ
តាមរយៈការអនុញ្ញាតឱ្យ សហគ្រាសធុនតូចនិងមធ្យម សម្រេចបាននូវវិញ្ញាបនបត្រសុវត្ថិភាពម្ហូបអាហារ កម្មវិធីនេះមានគោលបំណង កែលម្អលទ្ធភាពទទួលបានទីផ្សារក្នុងស្រុក និងអន្តរជាតិ បង្កើនគុណភាព និងសុវត្ថិភាពផលិតផលស្វាយចន្ទីកម្ពុជា និង ពង្រឹងជំហររបស់ប្រទេសនៅក្នុងឧស្សាហកម្មកសិចំណីអាហារសកល។
ខណៈពេលដែល សសក និង សហគ្រិនខ្មែរ ធ្លាប់បានសហការគ្នាលើគម្រោងមានកំណត់រួចមកហើយ ស្ថាប័នទាំងពីរបានបង្ហាញពីចេតនារបស់ខ្លួនក្នុងការពង្រីកភាពជាដៃគូ។ សហគ្រិនខ្មែរ បានស្នើសុំ ផែនការការងារ របស់ សសក ដើម្បីកំណត់អត្តសញ្ញាណតំបន់សក្តានុពលនៃការរួមបញ្ចូលគ្នា និងរួមគ្នាក្នុងការអភិវឌ្ឍគំនិតផ្តួចផ្តើមដែលអាចផ្តល់ផលប៉ះពាល់កាន់តែធំដល់វិស័យស្វាយចន្ទី និងសហគមន៍កសិកម្មកាន់តែទូលំទូលាយ។
ប្រភព សសក និង សហគ្រិនខ្មែរ ស្វែងរកកិច្ចសហប្រតិបត្តិការ ដើម្បីជំរុញវិស័យស្វាយចន្ទីកម្ពុជា | CAC