ភ្នំពេញ ថ្ងៃទី ៨ ខែកញ្ញា ឆ្នាំ ២០២៥— ជាជំហានដ៏សំខាន់មួយឆ្ពោះទៅរកការកែលម្អកិច្ចសហប្រតិបត្តិការកសិកម្មទ្វេភាគី ឯកឧត្តម ទូច ប៊ុនហូរ រដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ បានជួបពិភាក្សាការងារជាមួយ លោកបណ្ឌិត សូដាន់ស៊ូ (Dr. Sudhanshu) អគ្គលេខាធិការនៃអាជ្ញាធរអភិវឌ្ឍន៍ការនាំចេញផលិតផលកសិកម្ម និងម្ហូបអាហារកែច្នៃរបស់ឥណ្ឌា (APEDA) ក្នុងជំនួបសម្តែងការគួរសមមួយដែលធ្វើឡើងនៅទីស្ដីការក្រសួងនៅព្រឹកនេះ។
ឯកឧត្តម ទូច ប៊ុនហូរ បានស្វាគមន៍ប្រតិភូឥណ្ឌា និងបានសម្តែងចំណាប់អារម្មណ៍របស់កម្ពុជាក្នុងការការពង្រីកភាពជាដៃគូពាណិជ្ជកម្ម និងវិនិយោគជាមួយឥណ្ឌា ជាពិសេសនៅក្នុងវិស័យកសិកម្ម។
ជំនួបនេះបានគូសបញ្ជាក់អំពីឱកាសសំខាន់ៗសម្រាប់កិច្ចសហប្រតិបត្តិការ រួមទាំងការនាំចេញគ្រាប់ស្វាយចន្ទីឆៅរបស់កម្ពុជាទៅកាន់ប្រទេសឥណ្ឌា។ ភាគីទាំងពីរបានពិភាក្សាអំពីផែនការដើម្បីទាក់ទាញការវិនិយោគរបស់ឥណ្ឌាលើវិស័យស្វាយចន្ទីរបស់កម្ពុជា ដោយផ្តោតលើការបង្កើតតំបន់សួនឧស្សាហកម្មស្វាយចន្ទី (CIP) នៅក្នុងខេត្តកំពង់ធំ ដែលជាតំបន់ត្រូវបានគេកំណត់ថាមានសក្តានុពលខ្ពស់លើការដាំដុះដំណាំស្វាយចន្ទី។
ឯកឧត្តម ទូច ប៊ុនហូរ ក៏បានគូសបញ្ជាក់ផងដែរអំពីការត្រៀមលក្ខណៈរបស់កម្ពុជាក្នុងការស្វាគមន៍វិនិយោគិនលើការកែច្នៃ និងនាំចេញគ្រាប់ស្វាយចន្ទី។ ឯកឧត្តមបានលើកឡើងថា កម្ពុជាផលិតពូជស្វាយចន្ទីលំដាប់ខ្ពស់ដូចជា M23, M10, H09 និង IM4 ដែលមានភាពទាក់ទាញខ្លាំងនៅក្នុងទីផ្សារអន្តរជាតិ។
ជំនួបនេះត្រូវបានបញ្ចប់ទៅដោយលទ្ធផលវិជ្ជមាន ដោយប្រតិភូឥណ្ឌានឹងបន្តកិច្ចពិភាក្សាជាមួយតំណាងវិស័យឯកជនកម្ពុជា និងបន្តធ្វើទស្សនកិច្ចសិក្សាទៅកាន់ខេត្តកំពង់ធំ។ ដំណើរទស្សនកិច្ចនេះមានគោលបំណងលើកកម្ពស់កិច្ចសហប្រតិបត្តិការកាន់តែស៊ីជម្រៅ និងលើកទឹកចិត្តដល់ការវិនិយោគរបស់ឥណ្ឌាលើឧស្សាហកម្មស្វាយចន្ទីដែលកំពុងរីកចម្រើនរបស់កម្ពុជា។
ជំនួបថ្នាក់ខ្ពស់នេះស្របពេលជាមួយគំនិតផ្តួចផ្តើមធុរកិច្ចដ៏សំខាន់មួយដែលរៀបចំដោយនាយកដ្ឋានពាណិជ្ជកម្មនៃស្ថានទូតឥណ្ឌាប្រចាំនៅទីក្រុងភ្នំពេញ។ ព្រឹត្តិការណ៍នេះមានចំណងជើងថា «B2B Interaction 2025: Agriculture and Processed Food Products» ដោយបានប្រមូលផ្ដុំក្រុមហ៊ុនឥណ្ឌាចំនួន ២៦ និងសហគ្រាសកម្ពុជាដែលពាក់ព័ន្ធនឹងសាច់គោ សាច់ក្របី អង្ករ គ្រាប់ស្វាយចន្ទី និងម្ហូបអាហារកែច្នៃ។
សមាគមស្វាយចន្ទីកម្ពុជា (សសក) បានបញ្ជូនក្រុមហ៊ុនជាសមាជិកចំនួន ១០ ឱ្យចូលរួមក្នុងព្រឹត្តិការណ៍ B2B នេះ។ យោងតាមលោក អួន ស៊ីឡុត ប្រធានសមាគមស្វាយចន្ទីកម្ពុជា សសក កំពុងខិតខំប្រឹងប្រែងយ៉ាងសកម្មដើម្បីធ្វើពិពិធកម្មទីផ្សារនាំចេញសម្រាប់គ្រាប់ស្វាយចន្ទីឆៅ ដោយផ្តោតលើយុទ្ធសាស្ត្រទៅលើប្រទេសឥណ្ឌា និងចិន ដែលជាប្រទេសអ្នកប្រើប្រាស់គ្រាប់ស្វាយចន្ទីធំជាងគេបំផុតនៅលើពិភពលោក។
លោក ស៊ីឡុត បានថ្លែងថា៖ «យើងមានគោលបំណងកាត់បន្ថយការពឹងផ្អែកលើទីផ្សារតែមួយ។ ខណៈពេលដែលការកែច្នៃក្នុងស្រុកកំពុងអភិវឌ្ឍ ការពង្រីកទៅកាន់ទីផ្សារថ្មីៗនឹងជួយរក្សាតម្លៃឱ្យមានស្ថិរភាពសម្រាប់កសិករ និងធានានូវកំណើនប្រកបដោយចីរភាព»។