ភ្នំពេញកម្ពុជា ថ្ងៃទី១៤ខែសីហា —កម្ពុជាបានអំពាវនាវឱ្យមានការពង្រឹងកិច្ចសហប្រតិបត្តិការកាន់តែជិតស្និទ្ធរវាងរដ្ឋាភិបាល និងវិស័យឯកជន ដើម្បីលើកកម្ពស់ការតភ្ជាប់ពាណិជ្ជកម្ម ការវិនិយោគ និងភ័ស្តុភាកម្ម កាត់បន្ថយថ្លៃដើមអាជីវកម្ម និងពង្រីកទីផ្សារសម្រាប់ផលិតផលកម្ពុជា។
ការអំពាវនាវនេះ ត្រូវបានធ្វើឡើងនៅក្នុងកិច្ចពិភាក្សាស្តីពី «ការពង្រឹងការតភ្ជាប់ពាណិជ្ជកម្ម ការវិនិយោគ និងភ័ស្តុភាកម្ម៖ ការលើកកម្ពស់ការអភិវឌ្ឍវិស័យឯកជន និងការធ្វើពិពិធកម្មផលិតផលកម្ពុជា»ដែលបានប្រារព្ធឡើងកាលពីថ្ងៃសុក្រ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។
ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានអញ្ជើញជាអធិបតីក្នុងពិធីបើកព្រឹត្តិការណ៍នេះ ដែលត្រូវបានសហការរៀបចំឡើងជាមួយក្រុមហ៊ុន Yorker Trade & Marketing Service Co., Ltd.។
កិច្ចពិភាក្សានេះ បានប្រមូលផ្តុំមន្ត្រីមកពីក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រុមប្រឹក្សាអភិវឌ្ឍន៍កម្ពុជា សភាពាណិជ្ជកម្មកម្ពុជា និងកម្ពុជាប៉ុស្តិ៍ ព្រមទាំងតំណាងវិស័យកាត់ដេរសម្លៀកបំពាក់ ស្បែកជើង និងទំនិញធ្វើដំណើរ ធុរជនឯកជន វិនិយោគិន និងតួអង្គពាក់ព័ន្ធដទៃទៀត។ សមាគមស្វាយចន្ទីកម្ពុជា (សសក) ក៏បានចាត់តំណាងចំនួនពីររូបឱ្យចូលរួមផងដែរ។
ព្រឹត្តិការណ៍នេះ បានផ្តល់នូវវេទិកាមួយសម្រាប់អ្នកបង្កើតគោលនយោបាយ អាជីវករ វិនិយោគិន ប្រតិបត្តិករភ័ស្តុភាកម្ម និងដៃគូអភិវឌ្ឍន៍ ក្នុងការផ្លាស់ប្តូរទស្សនៈលើបញ្ហាប្រឈម និងឱកាសក្នុងវិស័យពាណិជ្ជកម្ម ការវិនិយោគ និងភ័ស្តុភា ព្រមទាំងកំណត់វិធានការជាក់ស្តែងដើម្បីកែលម្អប្រសិទ្ធភាពខ្សែច្រវាក់ផ្គត់ផ្គង់ និងសម្រួលដល់លំហូរពាណិជ្ជកម្ម។
ឯកឧត្តម សំហេង បូរ៉ា បានគូសបញ្ជាក់នូវអនុសាសន៍គន្លឹះចំនួន ៦ ចំណុច ដើម្បីពង្រឹងភាពធន់ និងភាពប្រកួតប្រជែងនៃវិស័យពាណិជ្ជកម្មរបស់កម្ពុជា៖
អនុសាសន៍ទាំងនោះរួមមាន៖
១. ការពង្រឹងកិច្ចសហប្រតិបត្តិការរវាងរដ្ឋ និងឯកជន ដើម្បីកែលម្អគោលនយោបាយ និងបរិយាកាសធុរកិច្ច
២. ការកែលម្អគុណភាព និងការបង្ហាញរូបរាងផលិតផលកម្ពុជា តាមរយៈការវេចខ្ចប់ និងស្តង់ដារឱ្យកាន់តែប្រសើរ ព្រមទាំងការលើកកម្ពស់ផលិតផល «ផលិតនៅកម្ពុជា» (Made in Cambodia)
៣. ការពង្រីកពាណិជ្ជកម្មឌីជីថល និងការចូលរួមរបស់វិស័យឯកជន
៤. ការពង្រឹងប្រព័ន្ធភ័ស្តុភាកម្ម និងខ្សែច្រវាក់ផ្គត់ផ្គង់ដើម្បីកាត់បន្ថយថ្លៃដើម
៥. ការទាក់ទាញការវិនិយោគ និងភាពជាដៃគូអន្តរជាតិ ដើម្បីគាំទ្រដល់ការកែច្នៃ ការទទួលយកបច្ចេកវិទ្យា និងការផ្ទេរចំណេះដឹង
៦. ការធ្វើពិពិធកម្មផលិតផល និងទីផ្សារនាំចេញ។
អនុសាសន៍ទាំងនេះ ធ្វើឡើងខណៈដែលកម្ពុជាកំពុងស្វែងរកការពង្រឹងការបង្កើតតម្លៃបន្ថែមនៅក្នុងស្រុក និងពង្រីកឱកាសទីផ្សារអន្តរជាតិសម្រាប់ទំនិញដែលផលិតក្នុងស្រុក។
អង្គពិភាក្សាទាំងមូល បានសង្កត់ធ្ងន់លើសារៈសំខាន់នៃការសម្របសម្រួលកាន់តែជិតស្និទ្ធរវាងស្ថាប័នរដ្ឋាភិបាល និងវិស័យឯកជន ដើម្បីដោះស្រាយបញ្ហាកកស្ទះក្នុងខ្សែច្រវាក់ផ្គត់ផ្គង់ កែលម្អសេវាកម្មភ័ស្តុភា និងលើកកម្ពស់ភាពប្រកួតប្រជែងនៃផលិតផលកម្ពុជា នៅលើទីផ្សារតំបន់ និងពិភពលោក៕
